يالله يـاخالق اراضيــن وابـحار = الواحـد المعــبود رازق عبـيده
الخـالق الغــفار علام الاسـرار = وفرق شعوب الارض فـي كـل يده
وابدي واسولف من عذيبات الاشعار = ابــيات شـعر والمعـاني وكيده
اشري وابيع واعرف كيـف بـختار = واختار مـن جزل البيوت الـفريده
واذكر تـراث وعز وامـجاد وافخار = قبائل تومـن بـديــن و عـقيده
وصلت حضارتنا على سطح الاقمار = ابنا الـجزيرة..والجزيره مــجيده
في ظل حكام لهــم فعل واشـوار = آل السـعود الـلي تـفك الضهيده
نسل الـزعيم الحاكـم العادل البار = مـجدد امـجـاد الجــزيره بجيده
حتى اصبحت حـره وحنا له انصار = فـي ظل اخـو نوره هنوف سعيده
وصارت لابـو تركي بطوله وتذكار = والـفخر والامـجـاد تبقى شهيده
وخلف لنا امـلوك لهم فعل واخبار = الشعب واحـد والـقياده رشـيده
والامن بـانينه علـى ساس وجدار = وقـرو علـى العابث عقوبه شديده
وحنا حـمـاة الـدار مـن كل غدار = ومـا همنا بـطشه..وخبثه وكيده
قـبائـل مـا لحـقنـاهـم اوعـار = وعـشنا بهذي الدار عيشه رغيده
والحمد لله نـحـمـده سـر واجهار = شعب..تـكاتـف من سنين مديده
ودون الوطن جيش عــلى كل معبار = لارفـرف البيرق ونـادى عقيده
بشـرق البلاد وغــربها دوم حضار = وارض الشمال اللي نفوده مديده
وارض الجنوب اللي تخيضر بالاشجار = جـزيـرة فـيـها القبايل عديده
ارض بـها قـحـطـان وافين الاشبار = ويـاعـز منهم بالشدايد بسيده
واذكر عـتـيـبـه يوم للطيب مغوار = لا ثارت الهيجا وقــرب ضديده
وشـمــر هل الطولات والجود مقدار = اهل الكرم واهـل الفعول الحميده
وقوم اعـنـزه مروين الاخصام الامرار = اولاد وايل مـن عـصور عهيده
ومـطـيـر قوم تكرم الضيف لا زرار = وياويل خصم فـي حراهم وعيده
واذكر قبيلة حـرب يـانـعـم الاخيار = وتاريخهم يـحكي سطور مجيده
وسـبيـع نـعم القوم ووجيه الاسفار = زبن الـدخيل ليا زبن من طريده
واذكـر قبيلة يـام والطيب ينـــدار = اهل الـعـلوم الوافيه والرشيده
ثم الـدواسـر تـجعل الخصم منهـار = عيال زايـد عــز منهم سنيده
ثم الـسهـول اللي لهـا الطيب مدرار = وعن منهج العادات ماهي محيده
ثم اذكـر الـعـجـمـان حماية الجار = والمرجـله والـجاه فيهم عتيده
واذكـر بـنـي مـره طويلين الاعمار = مـا ينقد الـمـري ولا له نقيده
ثم الـهـواجــر لابة تـقـدح النار = اهل الـركـاب اللي خطاها بعيده
واذكر بـنـي خـالـد قـبيلة وامار = قوم لهم فـي المجد قول ورصيده
وبـني تـميم اللي لها الطيب مصدار = بنـي تـمـيـم وكل فعل تجيده
ثم الـزعـوب اللي بها الخصم يحتار = شجعـان ما ترضى سوا ماتريده
العـازمي وافــي وفي الطيب بيطار = روحه على كل المصاعب صميده
ثم الـظـفـيري في المصاعيب جبار = والطيـب والامداح باصله وطيده
ثم اذكر الاشــــراف بجلال واكبار = اهل الـحـجاز اللي تفك الزهيده
ثم الـهـذيـلـي له مـواقف ومندار = راعي الفخر راعي العلوم السديده
ثم الـبـقـوم اللي لهم جيش وامهار = ريف الـضيوف ليا لفاهم وليده
واذكر ثـقـيـف اللي لهم مجد وآثار = ومهما حـسبنـا من كلام نعيده
وبـلـحارث اهل العز بشهود واقرار = الـحـارثـي ياطيب فعله وجيده
والـمالـكي معروف لا صار ما صار = في موقف اهل الطيب يبذل جهيده
واثني تحياتي عـــدد وبل الامطار = على سـلـيم وكـل خصم تكيده
واذكر جـهـينه..هل مواقيف وادوار = تلقى الجـهيني راسم الطيب بيده
واذكر بـلـي والمجدله فعل واظهار = وتاريخهم يـحكي فـعول فـريده
وبـنـي عطيه في المواجيب حضار = قـوم بوقت الجـد قـوم عـنيده
ثم الحـويــطي والكرامه له اشعار = ثم الـشـراري... له فعول مفيده
ثم الـرشـيدي في الصعيبات صبار = على عـلوم الـطيب فـعله يزيده
وباقي جـنـوب الدار والقاف مادار = باقي عـلى قلبي.. كـلام واشيده
زهـران نعم القوم في وقت الاضرار = والخصـم عـينه من لقاها سهيده
والغـامدي معروف له عزم واصرار = راعـي المراجـل والعلوم المفيده
وشـمران قوم والجمايل لها اطوار = وبـلـقـرن سم للقلوب الــنكيده
والاكـلـبـي والمحلفي مابعد بار = والـحـارثـي طيبه وفـعله يشيده
وبني شـهر وبني عمر سيف بتار = قوم على الاخـصام نـار وقــيده
والاسمري والاحـمري صيتهم سار = بين القبايل، والـمـواقف شـهيده
واذكر عـسير الهول ذربين الاذكار = وابها احتـموهـا فالسنين الشديده
وادهم والصيعر على حــد الاقطار = يحمون حــد الدار من اللي يريده
وامشي مع الساحل مع جمله افكار = رسمتها والـطيـر زان اتغريــده
وانزل على جيــزان تاريخ واديار = ورجال فـيـفـا والـقبايل عديده
وارجوا العذر واهل المواجيب عذار = الي نسيته مـانـذكـر في القصيده
الـواهـبـي عـدد ابيوته بالادوار = من شــــاعر ماشل قلبه حقيده
شهران ربعي هم هل المدح والكار = واهل الكند واهـل السيوف الجديده
يوم البلد مـا يامــن الزند لاثار = زيـزومنا ابـن مـشيط نعم الوليده
فالجهل شجعان وفـي السلم تجار = مـن بطن بـيـشـه للتهم لارفيده
حبيت ابين مـــوقفي بين شعار = وارجوا سـموحتكم على ذا النشيده
ماحب انافق واتــعنصر تعنصار = ولا ني باطيع اهــل العقول البليده
ما كل من طب البحر قيــل بحار = وما كل من شل الفشق جاب صـيده
فالشعر بستان بــه ورد وازهار = واللي تـــعداها بــــيوته فقيده
واقولها في الشعر تكــرار وامرار = ضرف بلا عنوان يلـــغى بريده
وبعض السوالف له مواقف ومحضار = وشعر بلا مـعـنى لــزوم نبيده
وصلوا على المرسول شفاع الابرار = محمد الهادي وقــدوة عـبـيـده