قال من له بالمثل قول ٍ طريف = من نوى طول السفر شد الحزام
القلم للقلب محبوبٍ وليف = يحفظ التاريخ ويحفظه النــــــــظـام
منبعى مكه وطيبه والعطيف = مولد المبعوث والبيت الحرام
منبعا ً للنور والدين الحنيف = مهبطا ً للوحى وآيات ٍ عظام
جدى المرحوم ابن عون الشريف =وديني الاسلام من قبل ألف عام
ورسمنا بأرض ٍ شمال ٍ من عفيف =مدهل ٍ للريم وزروف النعام
من عثاعث حبر مرباع ومصيف =والجرير وماتحدر من جهام
ورسمنا بالسر حول ابن الشنيف =عين راشد ماتبى صحة كلام
منقصنا بين هيف ٍ وبين سيف =من حرايب نجد وآلاد الخصام
نحمى المظهور بالحد الرهيف= وجارنا مدام معنا مايضـام
ونشرب الماء جم وألا من غريف =نشرب الماء من سعه وألا زحام
وننجع البارق ليا جاله رفيف =وترعت القرعه لنا فيها مقام
واستقرينا على بر ٍ و ســــيف= من شرا حمّا الى وادى سنام
بديرة ٍ ضمت من شتى لفيف= وعايش ٍ بأمن ٍ وأمان ٍ وسلام
قلبي واليها على قومه نظيف= يحترم قومه وحاضي باحترام
من تلال الذيب للرجم المنيف =حلة مبارك عليها بالتمام
والجهل والظلم مسلك للكسيف =وردوا تباعهن بحر الظلام
وتجرى الايام فى حكم اللطيف =عالم ٍ بالغيب عينه ماتنام
والبقاء لله وابن آدم ضعيف =والبشر تفنى ولله الدوام
واستعن في واحد ٍ ماله وصيف = الله اللي لا ينام ولا يضام