هذي قصيده الشريف جري الجنوبي
يقول جريٍ في ذرا رأس مرقب=طويل الذرا للريح فيه زليل
طويل الذرا تهفى الحواويم دونه=وللحر الأشقر في ذراه مقيل
لاتشرف المرقاب يلعب بك الهوى=يذكرك المرقاب كل خليل
يذكرك خلٍّ حال إبانات دونه=بواد الرشا يا مرتجيه هبيل
خليلين خلان الزمان إن تفرقوا=ياحسرتي وإن صرت بلا خليل
أنا جيت من نجد ولا يعرفونني=مع غزيو بدوٍ جيت لهم دليل
على فاطرٍ هباعة السير والسرا=لها في مهاميه الفقار رقيل
تاطا ولاياطا على القاع خفها=كما غصن موزٍ بالنسيم يميل
ليت العذارى كالحباري بروضه=وأنا طير شامٍ والهداد قليل
أصيد أم صومين وأصيد أم ثالث=وأصيد من ترمي لها بخليل
سقى الله وادٍ للحجاز امقبِّل=أبو سلمٍ ورق الغصون ضليل
ترا بأسفله سدرٍ وعالي فروعه=وسيله يفيض في قرا ونخيل
وترا بأوسطه جبارة اسلميه=ملعب لغضات الصبا ومقيل
تلقا بنات البدو يلعبن حولها=ويهزعن أغصانها وتميل
وتلقا بها راعي الذوابه جالس=أحم الاشافي في وجانه نيل
أحم الأشافي أدعج العين ليتني=ألاقيه وأنا بي عليه غليل
ياراعي الخد الذي فيه أماره=ثلاث لعوس ونقشهن جميل
ثلاث لعوسٍ مع ثلاث مع أربع=عشرٍ ولايغوا بهن دليل
ودي تجريني عليك بكلمه=خير المعاني للرجال دليل
قليلٍ من الحب الذي كان بيننا=غليل ولايبريه كل خليل
أريتك إلى ماجيت موزٍ بي الضما=ومعلقٍ بين اشفتيك صميل
ألاقيك وآخذ من ثناياك مزه=علي بها رب العباد وكيل
وأنشدك إلى ماجيت طلاب حاجه=وتهت وقلطت النشيد دليل
أنا أجيك؟ أو ما أجيك؟أو وش تقول لي؟=أو إنك على ماقد نويت بخيل؟
تاعد ولا تافي ؛ ولا تقطع الرجا=ولافي يدي مما تقول ضويل
ولاينفع المحتاج إلى قيل باكر=يجي ولايلقى بالأيدين حصيل
ويالايمي بالحب تبلى بمثلها=عساك في طرق السفاه تعيل
تلقا غزالٍ مثل ماإني لقيتها=تصبح وتمسي في هواه عليل
يلومني بالحب ثورٍ مقلد=لكنه من بين الجماعة فيل
يلومني في حب مسلوبة الحشا=عساه في طول الزمان خبيل
وترى ردي الراي تعمى بصيرته=وتيهات الأريا مالهن دليل
إلى عاد ما للرجل رأي يدله=يأخذ من اشوار الرجال دليل
ردت تجاوبني من الهجن عرمس=لها بين ملتج الضلوع عويل
تحن اليهوديات من ولف ساعه=تحن واحسب إن البعير هبيل
وترا هبيل القلب من لايهمه=فراق الاخله والزمان طويل
تبصرت وأنا في هواهم معاني=وشفت النيا في شف كل خليل
كم ساعة مابه هبوب وساعه=هبوبه لمبني الرواق يشيل
صن النفس واصدفها عن المكرهيه=لعلك تازي بالعيون جليل
وإلى فات شيٍ فارض بالعز دونه=ترا العوض فيما ينوب قليل
وترا روضة الجثياث مرٍ نباتها=مرٍ ولو هي كل يوم تسيل
وعرق الندا يندا ولو كان بالي=يندا ولو هو بالمراح امحيل
فإن كان ماتعطي والايام عدله=فالأيام لابد عدلهن يميل
وإن كان ميزانك على الناس مايل=صيور ميزانك عليك يميل
وإن كان مانفع الفتى في حياته=ترا النفع من بعد الممات قليل
ألا ما أكثر الخلان يوم نعدهم=كثير وعند الموجبات قليل
وإلى صرت في دارٍ مقل ومبغض=قليل المواشي والمقل ذليل
تنزح عنها بالرحيل وقل لها=مذكورةٍ يادارنا بجميل
قعودك في دار الهوان مجامل=كما باقرٍ يثغي لجلد حسيل
العوشزة ماياقع الحر فوقها=ولابه لسمحين الوجيه مقيل
وصلوا على سيد البرايا محمد=ماهل وبلٍ في حقوف السيل
الشاعر الشريف جري الجنوبي
العرض العادي
