بسم الله الرحمن الرحيم
إخواني الكرام / أعضاء ومتصفحي منتديات السادة الأشراف السلام عليكم ورحمة الله وبركاته وبعد : إليكم نبذة عن شاعر الحرب المهيج الكبير/ محمد بن عبدالله العوني رحمه الله وأسكنه فسيح جناته وهو شاعر القصيم بل شاعر نجد في زمانه وهو البيطار الفحل الشاعر : " محمد العوني " وقد إشتهر بأمرين جزالة الشعر والفتنة أو تأليب الفرق على بعضها وعاش / محمد العوني في الفترة ما بين سقوط الدولة السعودية الثانية وعاصر قيام الدولة السعودية الثالثة على يد موحد الجزيرة جلالة الملك / عبدالعزيز بن عبدالرحمن آل سعود رحمه الله وأسكنه فسيح جناته وكان كغيره من بعض الشعراء يتكسّب بالشعر فيزور الأمراء والشيوخ في مجالسهم ليمدحهم ويأخذ أعطياتهم .
قيل عنه : أنه من قوة شعره وقدرته على تأليب الفرق المتنافسة على بعضها - وبصيغة المبالغة طبعا - أنه كان إذا مر بين حجرين فتن بينهما !! عاب عليه أخوه وهو الفارس الذي كان يخرج مع العقيلات لحماية إبلهم ويغزو مع القبائل : ( لماذا ما تشد على الفرس وتغزي حالك حال هالناس ) فرد عليه العوني : ( الفخر يا خوي ما هو باللي يغزي بل الفخر - وأنا أخوك - باللي يحرك مغزى كامل وهو قاعد (ن) على مركاه ما تحرك ) !! وقد صدق بقوله هذا فهو من خلال وجوده في قصر السيف في دولة الكويت قال قصيدته المسمّاة : " الخلوج " في : " أولاد علي " وهي النخوة المعروفة للعقيلات من أهل القصيم على / عبدالعزيز بن متعب اّل رشيد فثاروا ضده وقد بنى قصيدته على منظر ناقة وقفت " تخولج " أي تحن بصوت مؤثر على حوار لها قد مات قبل سنة فرجعت إلى مكانه الذي تركته فيه ميتا وأخذت تخولج وتحن رأى ذلك العوني فتأثر به وبنى قصيدته عليه وشبّه القصيم بالناقة الخلوج !! وبنى عليها قصيدة الخلوج والتي يقول فيها :-
خلوج تجذ القلـب بأتلـى إعوالهـا
تكسـر بعبـرات تحطـم إسهالـهـا
تهيض مفجـوع الضمايـر بحسهـا
إلى طوحت صـوت تزايـد إهجالهـا
قد قلت له ياناق بسـك مـن البكـاء
لا تبحثين النفس عـن مـا جرالهـا
وصفه من الخفـرات بيضـا عفيفـه
يفوق كـل البيـض باهـر جمالهـا
حسودها يغضـي إلـى مـر حولهـا
من خـوف إعيـال تربـوا بجالهـا
هي أمنـا وا حلـوا مطعـوم درهـا
غذتنـا وربتنـا وحـنـا إعيالـهـا
بر وربتنا ما مثلهـا يكـرم الضنـى
بر وربتنـا لكـن نسينـا اوصالهـا
تلقى علينا الجـوخ والشـال فوقنـا
وهي عريانه تبكي ولا أحـد بكالهـا
ولا أحد جزع من صيحته يوم سلبـت
ولا أحد نشد من بعدنا وش جرالهـا
وقلن آه وا ويلاه يا خيبـة الرجـاء
كيف أمنـا تهضـم وحنـا إقبالهـا
يا طارشي من فوق سراقـة الوطـا
هميمة إلى سـارت ذعرهـا اظلالهـا
حايل ثمان اسنين مـا مـس حبلهـا
ولا بركـت للشيـل ولا ارتكالـهـا
إلى من بـدا لـي لازم قلـت شدهـا
واضبط عن الفزات مقضـت حبالهـا
ولا تعتني الخـرج مـا ذي بحزتـه
شل قربتك واجعـل زهابـك إعدالهـا
فإلى شلت خذ لي بالرسن قدر ساعـه
أبلغـك عـن دق المسائـل جالـهـا
أوصيك يا مرسال بالسيـر والسـرى
حاذور نـوم الليـل عينـك ينالهـا
إلى سرتها خمـس وعشـر مغـرب
مرواحـك الميـدان منهـى منالهـا
فوق بسوق العصـر يأتيـك غلمـة
تخثـع بزينـات البرسيـم إنعالـهـا
يقولون يـا صـاح عطنـا أعلومـك
وبلدان نجد عقبنـا وش جـرى لهـا
فقل كـل بلـدان القصيـم وغيرهـا
كل دار رمـت دون جالهـا ارجالهـا
غير أمكم من بعدكـم تنـدب الثـرى
تبكي على الماضيـن وا عزتـا لهـا
لعبوا بها الأجنـاب لا رحـم حيكـم
والبيض بالبلـدان شتـت اشمالهـا
وشيابكم تضرب على غيـر موجـب
من عقب كبر الجاه تجـذب اسبالهـا
أولاد علـي اليـوم ذا وقـت نفعكـم
لا رحم أبـو نفـس إتتاجـر بمالهـا
أولاد علـي اليـوم مـا هـو بباكـر
تقدموا بعـزم الليـث خلـوا رزالهـا
لا تتعبون الهـون والعجـز والعسـا
أو ربمـا أو ليـت يتعـب سوالهـا
أو كــود وإلا أرجــي قـولـة إلا
هاذيك ما لحقوا هـل العجـز جالهـا
وذي قالت مـا ينطحـه كـود نـادر
أولاد علي من هو اللي قال أنـا لهـا
ترى مركب الأخطار هو مصعد العـلا
ولا يـدرك العليـا غيـور اشكالهـا
أرووا سيوف العـز والمـال والبقـا
لجنـة الخضـرا بخضـرة اظلالهـا
ما دام أبو جابر علـى العـز والبقـا
عنـا ثقيـلات الحمـول ارتكالـهـا
إلى احترك سبـع الجزايـر تحركـت
وإلى رسا ترسـي رواسـي اجبالهـا
قومـوا بـراي الله واقضـوا دينكـم
أنتم هل القـالات مـا أنتـم ارذالهـا
قوموا براي الله ثم براي أبـو ثامـر
أبـو كلمـة يافـي حـيـن قالـهـا
عرق الوفا بحر النـدا مرهـق العـدا
وغن هاجت الهيجا تعرفـه اجمالهـا
هيج اسباع الحـرب بالبـر والبحـر
والشمس تشكي مـن عجـه ينالهـا
ومصقلات الهنـد تدعـي لـه البقـا
لولاه كان بغمدهـا اصـدت اسلالهـا
نشا مولع بالحرب والضرب ما شكـا
والخيل والعيـرات يشكـي اهزالهـا
من كثر ما مسهن على السير والسرى
من كثر ماخا ضن مهمـات سهالهـا
قـوي بـاس مـا يليـن المعضلـه
وإن اصكحت صعبات الأحوال شالهـا
شال الحمول الكايـدة يـوم جدعـت
وعفـا زمـول جدعتهـا ارجالـهـا
عفـا مراعيهـا وبـرد اظهـورهـا
وإن جودلت بالسيف عـدل جدالهـا
تذلل له السرحـان والنمـر والفهـد
من هيبته كـل بـرك فـي اظلالهـا
أقسمت ب***** والكرسـي والضحـى
واشهدت بسكاب المطر مـن خيالهـا
فلا جابت الخفرات سعدون او مشـى
مثله على وجه الوطا مـن ارجالهـا
من مثل أبو ثامر إلى ضبضب القهـر
والخيـل زاد مـن البـلا ارتجالهـا
له هدت مـا قبلـه أبـا زيـد هدهـا
ولا عنتر المشهور مـا قيـل نالهـا
على سابق تعيي علـى مـا يريدهـا
وتكـره صناديـد القبايـل قبالـهـا
كـن لـطـام العرانـيـن فوقـهـا
وغياهـب السعـدون تتبـع مجالهـا
شبيبـة تـروي مقـادم احرابـهـا
وذا قديـم طبـع جـدهـا وخالـهـا
إلى صاح بالمنشا على الموت سبلـوا
ووردوا كما سيل تحدر مـن اجبالهـا
نشامى يرون الموت بالعـز مفتخـر
وإن جاول الفرسان غابـت سوالهـا
أوى والله لابــة تــروي النـقـا
وهـم ذروة الدنيـا وذروة افعالـهـا
ولا هم مشافيق علـى عـز شيخهـم
وإلى عز شيخ القوم عـزت ارذالهـا
أبا أنسف على بعض الشبيبي ملامـه
وتكرم على شيـل الملامـه اسبالهـا
هالكيف عبدالله احمى الخيـل وابنـه
ملحق قصيـرات السبايـا اطوالهـا
تركـوا بنقيـان الصريـف ترودهـم
الضبعـا العرجـا وتنـدب اعيالهـا
وهم يزرعون العيش ما كـن كارهـم
ويـلاه يـا عيـن تزايـد همالـهـا
ولولا أبو ثامر بـرد حـر خاطـري
فرض سنة الشغـوم ميتـم أطفالهـا
سنة مهلهـل عـن كليـب خليصـة
فرضها أبو ثامـر وجـدد اسمالهـا
ذبحوا لعبدالله شيـوخ ضحـى اللقـا
مصابيـح ظلمـا الدجـى ينعالـهـا
ومن عقبهم اميـه وتسعيـن لحيـة
نفسه وعينه ما قضوا عشـر مالهـا
وإن عاش أبو ثامر وسانع له الهوى
كم خفرة ترمي الغطا عـن جمالهـا
تبكـي قصايرهـا وتبكـي حليلـهـا
وتبكي مشافيقـه وترمـي اعيالهـا
هذا وتم القيـل والله بالرجـا صلـوا
على المختـار مـا أهمـى خيالهـا
وقد زار في بداية حياته قصر برزان إبان سيطرة الأمير / محمد بن رشيد على نجد والقضاء على الدولة السعودية الثانية وهناك جرى بينه وبين الأمير / محمد بن عبدالله بن رشيد تحدي ولكي يثبت / محمد العوني شاعريته دعا شعراء ابن رشيد بأن يأتوا بقصيدة مهمّلة : ( تنظم جميع كلماتها من حروف لا تحتوي على نقط ) وأعطاهم أسبوع ليأتوا بها ففشلوا فقال : القصيدة المهمّلة التالية وكان له الجزاء الوافي والأعطيات الكثيرة :-
هل الهلال وهامـل الدمـع مـدرار
لا هل واهمل ماطره ,كلهلـل هـل
علـى مـود ملـك الله ولا صـار
له والمها ماله ولا رسم مـا كـل
صور وصار الملح والـدل والكـار
لا رام له حال ولا المال لـه حـل
لو صاح صالح طالعه ساع ما دار
اود على صدره على المسك عمّـل
سامح محمد لا رأى روس الأسطار
وحسامه الصارم لراع الهوى سـل
ولا رد كود أهلا وسهلا لـه كـرار
والحلم هـو والعلـم دلـه ولا دل
اساله وما درى الـود مـا صـار
ولا ولا لـه كـم دور لهـم عـل
أول صدور مواصله والهوى صـار
لما الدهـر رده علـى حالـه أوّل
ما صح عله والرعد ما وسـم دار
والحال حال الحول والحمل ما حل
ولولا حلاها حلهـا روس الأكـوار
ما حل له دل ولو هو حل مـا دل
عسا عسى ما كمـل الـدار للـدار
عاد الرحا دوره على روس الأوحال
وصلوا على طه عدد رمل الأوعار
أو ما كسا سهل الوطا للسما طـل
والجدير بالذكر أن للعوني رحمه الله نهاية كانت قاسية ومؤلمة ولأن الطبع غلاّب فقد أخذ يحرض العقيلات بعد إستتباب الحكم لجلالة الملك / عبدالعزيز رحمه الله لكي يثوروا عليه فما كان من الملك / عبدالعزيز رحمه الله إلا أن أمر بالقبض عليه وأرسله لإبن جلوي عامله على الأحساء الذي قام بسجنه في بئر مظلمة تسمى الدباب لعدة سنوات فقد فيها بصره وقد قال العوني رحمه الله وهو في البئر : قصيدة مشهورة سميّت بتوبة العوني وقد قالها يسترحم جلالة الملك / عبدالعزيز بن سعود رحمه الله وأسكنه فسيح جناته ويطلب منه أن يأمر بفك سجنه وكذلك كان الأمر فأفرج عنه الملك وعفى إلا أن القدر لم يمهل العوني ففاضت روحه إلى بارئها بعد أيام قليلة من خروجه
بسم الله الرحمن الرحيم
= :: [ تــــــــــــــوبة العـــــــــــونـــــــي ] ::=
يالله يا والـي علـى كـل والـي
يا خير من يدعى لكشف الجليلـه
المالك المعبود محصـي الرمالـي
الكون والدنيا وما بـه فهـي لـه
ما كان له أول ومـا كـان تالـي
ملكه يدبر به على مـا يبـي لـه
يقضي ويمضي قـادرٍ مـا يبالـي
والخلق ما تفعل بلا أمـره فعيلـه
ما له شريك جـل فـوق متعالـي
علمـه أحـاط بدقهـا والجليلـه
أشهـد فـلا غيـره إلـه ولا لـي
ربٍ سواه أخشاه وأرجـي لنيلـه
يا واحدٍ فـوق السمـوات عالـي
من سطوته كـل الخلايـق ذليلـه
يا فارج الشدة بضيـق الحوالـي
افرج لعبـدك يـا منجـي خليلـه
وانظر بعينـك يـا إلهـي لحالـي
فـردٍ غريـبٍ والمصاغـي قليلـه
وحيد ما لي غيـر ظلـك اظلالـي
ذليل ما لي غيـر عـزك وسيلـه
يا راحم ارحم شيبتـي وانخذالـي
يا جابر اجبر عثرتـي والفشيلـه
والطف وناظر يا الولي في سوالي
لا تواخذن فيما مضى مـن فعيلـه
لا إخوان لا عمان لا مـن خوالـي
ولا من صديقٍ بالوزى نشتكي لـه
لو كان ما يجلي سوى الله جالـي
ما شفت عبدٍ هرجته لـي جميلـه
تقطعـت وذم العـرى والمـدالـي
من جملـة الخـلان والمستخيلـه
قضيت من المخلوق ما أحدٍ بقى لي
إلا أنت ياللي مـا يخلـي عميلـه
عادون كل الناس شرق وشمالـي
ولا بقى غيـرك ذراً نلتجـي لـه
شافـون مذلـولٍ وحيـدٍ وخالـي
ولا لي من الفزعات مومي شليلـه
وأنـا بعـون الله امتـانٍ احبالـي
متجودٍ بحبـال منشـي المخيلـه
لو كان كلٍ لـه صديـقٍ اموالـي
أخـوال وأقـرابٍ ولأحـدٍ قبيلـه
أنا لي اللـي زابنـه مـا يسالـي
جزل العطا مبري الجسوم العليلـه
إلـى دعـوا حيانهـم فـز بالـي
رفعت طرفي له وقمت أشتكي لـه
والـى تنـادوا بينهـم للنـوالـي
ناديت بإسمك يا منشـي المخيلـه
من لاذ بك ما صار بالضيق تالـي
يصير الأول لو اعظامـه هزيلـه
أنا دخيلـك يـا عزيـز الجلالـي
حاشا كرم جودك يضيـع عميلـه
تبريت من غيرك بحالـي ومالـي
وزبنت أنا بحماك عن كـل ميلـه
من شر خلقك لايـذٍ بـك ومالـي
غيرك مـلاذٍ شامـخٍ ينعنـي لـه
يارب مالي غيـر جـدواك وإلـي
وإن كان خليتن فـلا لـي عقيلـه
يا عالمٍ بـا المخطيـه والعدالـي
تشوف مالي غير عدلـك وسيلـه
فـلا تؤاخذنـي بماضـي افعالـي
يا ساتر العورات مضفي الجميلـه
لو كان ذنبـي راجـحٍ بالجبالـي
عفوك عظيم ليس ذنبـي عديلـه
أطلبك تقبل توبتـي عـن خمالـي
وأطلبك عنـي كـل كـربٍ تزيلـه
وأطلبك تغفر لي وتصلح اعمالـي
يا مزبن الخايف إلـى بـاد حَيلـه
مولاي لا ملجـأ ولا ملتجـأ لـي
إلا أنت ياللي مـا يضيـع نزيلـه
يا فزعة المضيوم منشي الخيالـي
يا فارج الشدات لـو هـي ثقيلـه
أفرج لمن بالحبس دونه ارجالـي
أبـواب وأقفـال حصـونٍ ثقيلـه
في وسط دبـابٍ وحيـدٍ الحالـي
أظلم ولا أدري وش نهاره وليلـه
متروك مالي مـن يـرد المقالـي
لا أحد يبي قولي ولا أحـد يشيلـه
ولا أحـد غيـرك عليـه اتكالـي
إلا أنت يامنجـي دريـك الدبيلـه
ما دام تنظرنـي وتسمـع مقالـي
ما خاب عبدٍ يـدري أنـك وكيلـه
يا سامعٍ بالليـل حـس النمالـي
وصوت يونس في البحور الطويله
دعاء وضرب الموج مثل الجبالـي
فوقـه أجيبـت دعوتـه وتهليلـه
يا مصرف الأيـام هـي والليالـي
في قولته كن يجري القلم بتعديلـه
أدعوك بأسماك العظـام الجزالـي
وبحق ما خصت لك مـن فضيلـه
وبحق عظمـة قدرتـك والجلالـي
وبحق نـورك والفعـال الجميلـه
وبحـق مـا نزلـت أول وتالـي
تجيرني من شـر خلقـك طويلـه
وتزيـل كربـاتٍ علينـا اثقالـي
تغطلست مالي سـوى الله دليلـه
أمن على قلـبٍ يجـول اجتوالـي
يا مسكن الروعات سكـن جفيلـه
اسرع علينا يـا قريـب النوالـي
لا تجعـل الشـده علينـا طويلـه
يا فارج الكربه بضيـق الحوالـي
أومر العبـدك بالفـرج واتعجيلـه
واجل الأمور المعظلـه والجلالـي
عن كل عبدٍ مسلـمٍ يندعـي لـه
صلاة ربي عـد رمـل السهالـي
علـى نبـيٍ وضـح الله دليـلـه
صفوة قريش اللي مشى بالعدالـي
نبينا المعصـوم عـن كـل ميلـه
تمـت وفرجهـا عزيـز الجلالـي
فرحت بالطارش وقمت ادعي لـه
هذا والله يحفظكم ويرعاكم منقول من مواقع الاشراف مع خالص التحية وأطيب الأمنيات وأنتم سالمون وغانمون والسلام .
__________________
آخر 10 مشاركات
= :: [ شاعر الحرب الكبير / محمد العوني رحمه الله ] :: =
العرض العادي
