كيفية التحكم بإعدادات التنبيهات في تطبيق الواتس اب
كيفية التحكم بإعدادات التنبيهات في تطبيق الواتس اب
خلونا نكون صريحين مع بعض شوي ، ما أعتقد فيه أحد يستخدم برنامج الواتس اب ما مرت عليه الحاله أن يفتح البرنامج ويلقى نفسه مضاف لقروب، قد يكون قروب زملاء عمل ( واحد منهم مسوي بيجمع شملكم ) أو أصدقائك أو أقاربك … ولسببٍ ما ماتقدر تطلع منه
وأكيد مثل أي قروب الا ما تمر لحظات يكون فيه أثنين قاتلهم الفراغ وجالسين يسولفون عن شيء معين وأنت ماكلها وحاط جوالك على الصامت والا حاطه تحت المخدة .. أنا عن نفسي أعتبر القروبات شيء جانبي وممكن استغني عن تنبيهاتها لانه وبشكل عام المحتوى حقها غير ضروري وممكن اطلع عليه في أي وقت يناسبني وبدون أي إزعاج
عشان نتحكم بالأصوات والتنبيهات أول شيء نسويه نفتح الواتس اب وبعدين نختار الخيار الأول على اليمين تحت ( Settings )
بعدين نختار الكلمة المحددة بالأحمر ( Notifications )
بتحصل هالخيارات قدامك .. بالنسبة للخانات العلوية اللي تحت العنوان ( Messages Notifications ) فهي خاصة بالرسائل الشخصية اللي توصلك مباشرة من دون قروبات، تحتها خيارين .. الأول يسمح لك بتعديل نغمة الرسالة بحيث تقدر تفرق بين اصوات القروب واصوات الرسائل الشخصية .. وأما الخيار الثاني فهو خاص بإيقاف التنبيهات بحيث ما يوصلك أي صوت!
اما القسم الثاني اللي تحت العنوان ( Group Notifications ) فهو خاص بالقروبات ونفس الكلام اللي فوق مكرر هنا .. تتحكم بالاصوات أو توقفها تماماً
طيب لنفرض أن عندك قروبات كثيرة لكن يهمك منها قروب معين؟ أو العكس عندك قروبات كثيرة وتهمك كلها ما عدى واحد
في هالحالة تفتح القروب اللي تبيه وبتحصل فوق على اليمين ( info ) اضغط عليها
وبعد ماتضغط عليها بتفتح لك صفحه خيارات
بالنسبة للخيار الأول المحدد باللون الأزرق فهو بيعطيك نفس الخيارات السابقة وهي تخصيص نغمة معينة للقروب أو إيقاف التنبيهات من هذا القروب بشكل دائم .. أو العكس لو كنت مسوي إيقاف للتنبيهات للقروبات كلها بتقدر تشغل التنبيهات لهذا القروب فقط من هالخيار!
اما الخيار الثاني فهو ( صامت ) وهو يعطيك الخيار أنك تسوي كتم الصوت للقروب بشكل مؤقت
لما تضغط عليه بيعطيك ثلاث خيارات، الخيار الأول ٨ ساعات .. والثاني لمدة يوم كامل .. والثالث لمدة أسبوع