الحب مثل النوم..والوصل الاحلام
والشين مـن الاحلام..صد المحبين
نوم ٍ طويل ٍ عمره شهور واعوام
وان قمت..فـ افهمها فراق وسهر عين
وانا رقدت وعمري اربع عشر عام
وصحيت في شهر اربعه عام الالفين
نوم ٍ ثقيل ٍ كله احلام واوهام
ونصيبي من احلامه الجانب الشين
صحّى الفراق قلوب في عكسه..نيام
وغاب الفرح وانا بعكسه الى الحين
ياحزن كبدي حزن من ضاق ثم حام
اخذت فروخه مادرى ليه ولوين؟
بعد ماشاف العش عيدان وعظام
خاالي..تفكر فوق ويسار..ويمين
خلّى عشاها فيه ومن الوطى شام
زبن على روحه وفل الجناحين
وياوجد حالي وجد من نام ثم قام
على صياح امه وهو دون رجلين
عويـق وامه تنعته والنعت سام
وهو خابر انه يقسم الصف صفين
حبى وصاح بصيحةٍ تاصل الشام
منها تقطع في خفوقه شرايين
على وليف ٍ قسم ظنوني اقسام
واقفى وانا ما اعرف طرد المقفين
راح وترك في صدري وسوم واعلام
وصى علي طيفه وقفى بقلبين
ليته تعذّر كان ماهوب منلام
بعد ماشاف الدرب بيصير دربين
اشوى عليه شوي..من عظ الابهام
واشوى علي شوي..من دمعة البين
تمشي بنا الاقدام والموت قدام
وميعادنا يامفرق اثنين بعدين
ياعين لا تبكين وعيونه تنام
عادش الى ماخاب ظني بترضين
لو الدموع تفيد فادن الايتام
ولو الكلام يفيد عادت فلسطين
ولو النبات يطلّعـه دمعة هيام
شفتوا على وجهي ورود وبساتين
الحب سجن..وبعد الاحباب الاعدام
وقلوبنا السجان ماادري مساجين
الحب نوم ٍ عمره شهور واعوام
وان قمت..فـ افهمها فراق وسهر عين
وانا تراي انعست من مدة ايام
لحدن يصحيني يالاقدار..تكفيييين...!
وسلامتكم .. قصيده عزيزه على قلبي وأتمنى تنال أعجابكم